أضف سؤال أو موضوع جديد          

تجربة شراء قطع غيار من الخارج

up 8 down 1
king.king 833
قبل 3 سنه



السلام عليكم

خويي في الدوام سيارته رينو كليو صار فيها تقطيع وتفتفة
الميكانيكي يقول لازم تغيير كويلات
لما سأل في الوكالة طلعت الاربعة كويلات ب 1019 مع الضريبة

المبلغ كان كبير عليه.. قلت له خلينا نجرب وندور مواقع قطع الغيار

الحمدلله حصلنها في موقع ايباي eBay من بريطانيا ب 69 دولار يعني 259 ريال واصلة لين باب البيت مع شحن مجاني

الصورة الأولى محادثته مع موظف قطع الغيار

الصورة الثانية الطلب ومعاه السعر ولازم تنتبهون اذا بتطلبون من برا لعمولة الشحن اللي حاطط عليها بالاخضر

الصورة الثالثة الكويلات بعد وصولها

علماً انها اخذت اربعة ايام فقط ووصلت عنده









إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


هل تضمن تغير الكويلات و يروح التقطيع مجرد تخمين من المكانيكي و لو ٤ كلها خربانه السيارة ما بتمشي لو واحد فقط عطلان يروح اكثر من نصف قوة السيارة ماهو مجرد تقطيع فقط فكيف تغير ٤ كلها


كلام ابو نايف  صح

اغلب الميكانيكيين يخمنوا ممكن ما يطلع كلامه صح  اللي رحت عليه و بكذا تكون  خسرت على الفاضي

انت قبل لتغير روح عند اكثر من ميكانيكي و تأكد منها 


ابو نايف كلامك صحيح.. بغض النظر عن ان كلام الميكانيكي صحيح ام لا.. الفكرة ان قطع الغيار من برا ارخص وتوفر كثير بعيد عن جشع الوكالات..




up 2 down 2
king.king 833
قبل 3 سنه



فعلا كلام ابو نايف صحيح
انا بغيت اغير 6 كويلات للكامري
على كلام فلبيني بغى يخسرني
لولا الله ثم كهربائي مصري
قالي مستحيل تكون كويلات
واكتشف العلة من البواجي غيرتها والى يومنا هاذا
ماعاد رجعت المشكلة
انتبهوا من الي يخمنون مافكر كم تصرف ولا علية
اهم شي ياخذ فلوسك ويقول شوفني فحصت وسويت وسويت


up 2 down 0
الرفاعي33 13911
قبل 3 سنه



سبق لي محاولات لشراء من امازون وايباي بس الشروط صعبة علي كطالب

اولا تحتاج فيزا ورسموها 100 في السنة تقريبا ولازم فوق 18 ولازم يكون عندك حساب في البنك اتوقع
ثانيا تحتاج وسيط وهيا خدمة شوب اند شيب علشان تعطيك بريد في امريكا وتقريبا رسومها حول 200 مدى الحياة
والشحن ممكن علشانها اول عملية شراء لك الا اغلبها عليها رسوم
ورسومها كالتالي
اول نص كيلو عليه 58 وبعدين النص الاضافي يحسب 32
وهذا الموقع تبع خدمة شوب اند شيب مباشرة راح يدخلك على الاسعار
https://www.shopandship.com/ar/about/country-rate

ودخلت على حاسبة الاسعار تبع الخدمة
وطلع تكلفة شحن 2 كيلو 158 ريال من غير الضرائب والجمارك ان وجدت!!!

الا صراحة المواقع الاجنبية فيها اشياء ما تخطر على البال واسعارها خيال
بس يبغالها واحد موظف مو مثلي هههههههه


اما التوفير صراحة توفير واشكرك علي سويته
وانصحك تحتفظ بالكويلات القديمة لان مستحيل كلها خربانة






up 2 down 0
mercy_sa 1075
قبل 3 سنه



عليكم السلام ورحمة الله وبركاته
الله يعطيك العافية ياخوي على الافادة بس المفروض
ما تعتمد على ميكانيكي واحد المفروض تروح ل اكثر من واحد
وللمعلوميه الكويلات تفتفتها بسيطة اما البواجي يروح نص عمر المحرك
ومره تقطع ومره تصح هذي اعراض البواجي بس ان شاء الله يطلع من الكويلات
حتى ماتخسر ع الفاضي


up 4 down 4



تعديل يروح **نصف عزم المحرك **
لانها هي المسؤولة عن انفجار خليط الوقود


up 0 down 2



اخ نواف
كلامك غير صحيح انت قلت العكس تماما
البواجي تفتفتها بسيطه و تقدر تسافر بالسيارة لكن الكويل لو واحد تعطل السيارة تموت تماما و لازم تدعس لها دعسه بسيطه عشان تمشي و تتجاوب معك ولو دعست لها دعسه قوية تكتم ما تمشي بعكس البواجي تدعس لها كامل الدعسه تمشي معك لكن فيها تفتفه و ضعف بسيط بالعزم


عندي بفوردي بوجي طافي غيرت البواجي كلها الا واحد يحتاج خرط سنه وتركته قسم بالله مع الطلعه من سرعة 120 توصل الى 100 انت تقصد اذا الكويل طافي مره واحده هنا كلامك صح اما كويل فيه ضعف تمشي معك


up 0 down 2



وللمعلوميه البواجي تفتفه مع تقطيع خصوصا مع الطلعات تكره السياره مو زي الكويل تفتفه بس


up 0 down 1



تاكد من معلوماتك يا نواف الكويل يسبب كتمه يموت عزم السيارة ولا تقدر تطلع مرتفعات اصلا اما البوجي طبيعي تمشي الا لو كان مركب نوع غير المخصص لها انت واضح ما جربت خراب الكويل
الكويل ما يضعف يخرب نهائي و تكتم السيارة لو ضعف يعني من جلدة الكويل ماهو الكويل نفسه و البوجي يضعف اذا تراكم عليه كربون بخلل بدائرة الاحتراق او نوع غير المخصص لها ما يحرق البنزين بالشكل المطلوب


خلاص انت صح وانا ماعندي سالفه +1


up 0 down 3



ليش تزعل من تصحيح المعلومه المنتدى لتبادل الخبرات
و الاعطال تختلف بين السيارات ملاحظ ردودك جميع الاعطال تطبقها على الفورد و هذا غلط عطل بسيارة معينه قد يختلف عن سيارتك


اخ mercy
الآن ماتحتاج بطاقة ائتمانية
تقدر تستخدم نفس بطاقة الصراف العادية
وبالنسبة للعنوان الامريكي
تقدر تشترك بواصل العادي بلاش ويعطونك عنوان امريكي خاص فيك
وانا انصحك بموقع aliexpress الصيني افضل وارخص
صحيح ان وقت الشحن يطول لكن بتوفر كثير وشحن مجاني

اخر شي شريته جهاز تشغيل عن بعد لكن ماركبته باقي ، يحتاج فضاوة ورواقة


up 0 down 1
فورد530 1320
قبل 3 سنه



فحص الكويل سهل تكون السيارة شغالة وتفكه لو صارت رجه بالمكينة فهو تمام واذا لا فهو خربان


up 0 down 1
mfh2009 363
قبل 3 سنه



استودع كم الله ياعرب في رعاية الرحمن


up 0 down 0



وين يا نواف باقي ما اذن العشاء ماهو وقت نوم


لاتطقطق بكره بقبرك ماينفعك غير عملك الصالح انا طلعت من المنتدى علشان ماتجيني نفسيه تجربه وعدت على خير استودعكم الله


up 0 down 1



بالنسبة لقطع ايباي وامازون اغلبها غير اصلي ..القطعة تجي نفس رقم الوكالة ولكن المصنع يختلف والجودة تختلف عن تجربة


up 0 down 1



عليكم السلام

ما شاء الله.. فرق شاسع


up 0 down 3
ابوسيف12 184
قبل 3 سنه